الخازوق

     

    القصة المعروفة عن الخازوق أن فيه ملك زمان مش فاكر اسمه بصراحة ، كان بقتل و يعذب اعداء بطريقة غريبة أنه بيجيب وتد طويل طبعا يكون حاد وجاهز  ويحطوا فى منطقة معينة كدا فى جسم الانسان اكيد كلنا عارفينها لحد ما يطلع من راسه ، فى النهاية الراجل دا اتعرف بأسم دراكولا ، واللى اتبنى عليه قصص مصاصين الدماء والشغل دا .

    طبعا لما تتخيل الموقف ، طريقة وحشية جدا للتعذيب والقتل ، بس فى الوقت الحالى 2017 سيبك من دا ، انك تكون مواطن مصرى ، فالخازوق بالنسبالك شئ عادى ، انا شخصيا بتخوزق فى اليوم 5 أو 6 مرات على الأقل ، انت دلوقتى وانت بتقرأ المقالة دى ممكن تكون قاعد على خازوق بس مش حاسس ، وممكن يكون بيتجهزلك خازوق وانت مش عارف دا شئ طبيعى عندنا ، فعليا بقينا بناخد كل خازوق اوسخ من اللى قبلة .

من اول ما تطلع للدنيا فى بلدنا الحبيبة بيم تربيتك باسلوب اسمع الكلام علشان كدا عيب من غير ما تعرف هو دا عيب ليه ولا غلط ليه هو كدا اسمع ونفذ وخلاص ، انا بالنسبة ليا دا كان اكبر خازوق فى حياتى ، انى اتربيت بحاجة شبة كدا أو عموما معظمنا اتربه كدا ، معظم العادات والتقاليد الاجتماعية اللى اتعلمناها منعرفش اصلا بنعملها ليه ، بس اهو بنعملها علشان اللى قبلنا عملوها واللى قبلهم عملوها ونخش فى دائرة ماضى ملهاش اى ٦٠ لازمة .

بعد كدا تخش ع الثقيلة "التعليم فى مصر" باختصار التعليم فى مصر عبارة عن حاجة كدا شبة الزفت بصراحة اسود ف اسود من غير اى مبالغة ، وانت مجبر انك تتعلم علشان ترتاح لما تكبر "ملحوظة .. دى اكبر كذبة هتسمعها فى حياتك وأكبر خازوق هتاخدة برضة فى حياتك " ، يا راجل دا كفاية الثانوية حاجة كدا والله ملهاش وصف فعلا فترة فى منتهى القذارة لازم تعيشها يلا منهم لله بقي .

عموما علشان نخلص من التعليم بتوصل للجامعة ، العالم المفتوح يعنى خلاص كبرنا وبقينا بشنب سواء ولاد أو بنات ، يعنى اخيرا هنصاحب بنات ونخربها خروجات ورحلات ومعسكرات يعنى اروح أو مروحش ميفرقش معايا انا راجل كبير واعمل اللى انا عايزة .
طيب علشان مطولش عليك احب اقولك مفيش الكلام دا ومتزعلش نفسك كلنا لها يا بنى كلنا كنا فاكرين كدا لحد ما لبسنا ، اه وبقولك ايه اعمل حسابك ان احتمال انك تشتغل بالشهادة دى فى البلد دى مش معدى ٤٠ ٪ وانا كدا مبالغ بصراحة مع انى شغال بالشهادة بتاعتى اه والله يا اخى زى ما بقولك كدا .