التخطي إلى المحتوى الرئيسي

حياتك فى اكونت فيس بوك !

   

      فى العادة كل واحد فينا بيسيب وراه حاجة سواء عيلة ، شغل ، ميراث اى حاجة من الحاجات المتعارف عليها دى ، بس فى الحالة دى الشخص دا ساب وراه اكونت فيس بوك !
الموضوع ابتدا لما اشتريت خط موبايل جديد  وبعد فترة كبيرة من الاستخدام ، جه فى بالى فكرة لما اجرب اكتب رقم الموبايل دا على الفيس بوك وأشوف ليه اكونت ولا لا .
فعلا عملت كدا وفعلا لقيت اكونت ، فكرت كتير اغير كلمة السر ولا لا ، المهم بعد تفكير قررت فعلا اغير كلمة السر وافتح الحساب وأشوف ايه الدنيا فيه .
خلاص خلصت كل حاجة الاكونت باسم وليد احمد ، باين من شكل الاكونت أنه قديم وان صاحبه سايبة من زمان ، المهم وانا بقلب فيه دخلت على الصفحة الشخصية .
نقف هنا شوية ، بصراحة من الوقاحة انك تعمل كدا , يعنى فكرة انك تشوف خصوصية حد مش حلوة بالمرة وانا كنت بتمنى انه يكون اكونت ملوش لازمة لحد .
نرجع تانى , كان اكونت عادى جدا وزى ما تمنيت كان اكونت قديم لحد , بس وليد دا مش اى حد , اول ما دخلت صفحته الشخصية اول بوست كان موجود كالتالى "اللهم اغفر له وارحمه" , لك انت تتخيل الصدمة اللى كنت فيها الاكونت كله عبارة عن ترحم عليه .

انا فاكر زمان كان مقال قريته بعنوان "ماذا يحدث لصفحتك في الفيس بوك بعد موتك؟" وكان الفيس بوك من المواقع اللى بتسيب الحساب شغال عادى لحد ما ييجى حد من الاهل يبعتلهم انهم يلغوا الاكونت للوفاة والكلام دا ولو محدش عمل كدا هيفضل الحساب شغال , زى اكونت وليد فضل لحد ما شاء القدر انه يبقى معايا انا .

الحقيقة انى بقى عندى فضول غريب اعرف وليد اتوفى ازاى , لان الاكونت كمان باين عليه انه اكونت واحد صغير مش كبير , في يوم فتحت الاكونت واخترت واحد من الناس الاونلاين عنده وسألته سؤال محدد بعد ما عرفته نفسى " هو وليد صاحب الاكونت دا متوفى ؟"  طبعا ردة فعله كنت متوقعها " محمد مين ؟ وفتحت الاكونت دا ازاى " .

اختصارا للوقت بعد ما عرفته الحكاية , عرفت منه ان وليد كان عيان جامد بالقلب وانه كان متجوز وسايب وراه طفلين , وفى النهاية اتفقنا انى هقفل الاكونت علشان محدش يشوفة مفتوح والناس تتكلم وكدا .

في النهاية , كان شيء مؤلم في الحقيقة خاصة لما فكرت ان فعلا دا هيحصل لينا كلنا في يوم من الأيام , فكرة انك تموت وان بعد موتك وبعد ما كنت انت الوحيد اللى عارف الاكونت دا فيه ايه كلمت مين وعملت مصايب مع مين كل دا ممكن ينكشف لحد غريب لا يعرفك ولا تربطك بيه اى علاقة لمجرد انه جاب خط موبايل جديد ويطلع انة رقمك القديم .

انا واحد من الناس اللى مبحبش حد يعرف عنى حاجة و ذكرياتى دايما مش بحب اشاركها مع حد , فنصيحة منى الغى رقم موبايلك من الفيس بوك وكفاية انك تسجل بالميل الشخصى وخلاص على كدا .


التسميات:

تعليقات

إرسال تعليق

المشاركات الشائعة من هذه المدونة

الخازوق

          القصة المعروفة عن الخازوق أن فيه ملك زمان مش فاكر اسمه بصراحة ، كان بقتل و يعذب اعداء بطريقة غريبة أنه بيجيب وتد طويل طبعا يكون حاد وجاهز  ويحطوا فى منطقة معينة كدا فى جسم الانسان اكيد كلنا عارفينها لحد ما يطلع من راسه ، فى النهاية الراجل دا اتعرف بأسم دراكولا ، واللى اتبنى عليه قصص مصاصين الدماء والشغل دا .     طبعا لما تتخيل الموقف ، طريقة وحشية جدا للتعذيب والقتل ، بس فى الوقت الحالى 2017 سيبك من دا ، انك تكون مواطن مصرى ، فالخازوق بالنسبالك شئ عادى ، انا شخصيا بتخوزق فى اليوم 5 أو 6 مرات على الأقل ، انت دلوقتى وانت بتقرأ المقالة دى ممكن تكون قاعد على خازوق بس مش حاسس ، وممكن يكون بيتجهزلك خازوق وانت مش عارف دا شئ طبيعى عندنا ، فعليا بقينا بناخد كل خازوق اوسخ من اللى قبلة . من اول ما تطلع للدنيا فى بلدنا الحبيبة بيم تربيتك باسلوب اسمع الكلام علشان كدا عيب من غير ما تعرف هو دا عيب ليه ولا غلط ليه هو كدا اسمع ونفذ وخلاص ، انا بالنسبة ليا دا كان اكبر خازوق فى حياتى ، انى اتربيت بحاجة شبة كدا أو عموما معظمنا اتربه كدا ، ...
إرسال تعليق
قراءة المزيد

ابقى من اجلى فى ذكرياتى حيث تنتمى .

   كنت دايما بسأل نفسى انا ليه بفتكر الماضى , ليه دايما الحنين لحاجات وناس مبقوش اصلا معانا . الحنين !! ايوة الحنين لايام واحداث وناس كنا كل شوية معاهم ودلوقت مبقاش فاضل منهم غير ذكرياتهم اللى بقيت بحاول افتكرها , بس دايما الزمن فعلا عنده قدرة رهيبة انه يخليك تنسى , او بالمعنى الاصح يشيل الالم من قلبك علشان تعرف تكمل ,علشان تعيش , علشان فعلا الدنيا مش بتوقف على حد , فعلا محدش هيبقى . كل الحنين دا لحاجات راحت من زمان , انا بعترف انها كانت ايام حلوة وبتمنى ترجع تانى علشان اعيش فيها ولو لمجرد لحظات , ارجع تانى واحاول اصلح اللى اتكسر , بس الحقيقة ان الناس بتتغير ومبيفضلش حاجة غير الذكريات . عارف انت لما تعد لوحدك ومعاك الهاند فرى ومشغل اغانى وضارب الدنيا بالجزمة وعايش لحظة التأمل دى وبتفتكر اللى فات وتعيش حالة الفراغ اللى محدش هيفهما غيرك , الضحكة الهبلة اللى بتطلع لوحدها علشان بس افتكرت حاجة حلوة او وحشة او حتى افتكرت قد ايه كنت اهبل قوى وانت صغير , الدمعة اللى عايزة تنزل وبتعافر بس انت حالف انها متنزلش مهما حصل حتى لو لوحدك . عموما .. لكل شخص انا حبيتة وخذلنى او ح...
إرسال تعليق
قراءة المزيد

انا معاه

بقولك ايه ؟  ما تيجي نخرج ؟ ماشي بس عايزة اروح مكان بعيد ! ماشي اشطة ، البسي وهعدي عليكي  . ذلك الشعور بالسعادة التي لا توصف ، وانت ذاهب لتري من تحب ، فقط مجرد التفكير بانني ذاهب لكي ارها ، يصيبني بالجنون . نعم ! فهي تلك الفتاة التي تحبني كما انا مهما ان فعلت ومهما ارتكبت من اخطاء لا تغفر ، هي فقط من تفهم من انا ، هي فقط من اتجرد معها من كل شيء واصبح انا ، تظهر تلك الشخصية الغريبة بكل معلمها معها هي فقط . لقد مرت العديد من السنين ونحن معا ، دائما ما نفتعل المشاكل معا ، دائما ما تمر الايام ونحن لا نتحدث ، ولكن نبقي معا مهما حصل . من الصعب ان تجد من يشبهك لتلك الدرجة ، من يفهم كل معانيك ، من لا تستطيع ان تكون شخص اخر معه ، فقط اكون انا وتكون هي هي ، ومع هذا يبقي ذلك الاعتقاد باننا لن نكون معا في النهاية فكلانا مؤمن باننا لن نصلح ان نكون زوج وزوجة ، فنحن اكبر من ذلك بكثير ، تلك السعادة التي نحصل عليها عندما نكون معا ، لن تكون هي هي عندما نتزوج لا اعرف لما هذا الشعور . ها انا وصلت ، وها هي تنظرني واقفة بتلك الابتسامة التي تصيبني دائما بالجنون وتجعل تلك المضحة...
إرسال تعليق
قراءة المزيد